Nəfəs LGBTİ Azərbaycan Alyansı fəaliyyətini Azərbaycanda LGBTİ+lərin rifahının və hüquqlarının müdafiəsinə həsr etmiş qeyri-siyasi, qeyri-kommersiya, könüllü özünüidarəetmə əsaslı kollektivdir.

Macəramız 2012-ci ilin bir qış axşamı başladı. Elə bir zamanda ki, o vaxta kimi səbir etdikləri hər şey və mühit Sumqayıtda yaşayan iki kuir üçün dözülməz həddə çatmışdı. İndi isə biz hər bir LGBTİ+nin azad, bərabər və təhlükəsiz hiss etdiyi bir Azərbaycan arzusu ilə göy qurşağı altında toplanmış bir kollektivə çevrilmişik.

Vizyonumuz

Bizim təsəvvür etdiyimiz cəmiyyət fərqliliklər üzərində qurulmuş və müxtəlifliklərə qucaq açan ədalətli və bərabərhüquqlu cəmiyyətdir.

Yaşamağa can atdığımız o cəmiyyətdə
- insanların seksual orientasiyası, gender kimliyi və ifadəsi zorakılığa və ya aqressiyanın başqa formalarına aparıb çıxarmır;
- hər kəs, o cümlədən LGBTİ+lər öz bəyanlarına uyğun olaraq azad və ləyaqətli həyat şərtlərində yaşayaraq cəmiyyətin iqtisadi, mədəni və siyasi həyatında iştirak edir.

 

Missiyamız

Sosial ədalətə və həqiqi bərabərliyə çatmaq üçün təkcə qanuni dəyişikliklər kifayət etmir, bunun baş verməsi üçün cəmiyyətin yanaşmasında köklü dəyişikliyə ehtiyac var. Bəli, bu dəyişiklik zaman tələb edir və bizim missiyamız onun baş verməsi üçün cəmiyyətin sosial, iqtisadi, siyasi və mədəni həyatında dərin kök salmış qərəzləri qırmaq, təcridedici vərdişləri və təcrübələri dəyişmək üçün çalışmaqdır.

 

Biz Nə Edirik

İşimizin Vacib Elementləri

İcma quruculuğu

Sosial ədalət və bərabər hüquqlar uğrunda çıxdığımız bu yolda dinamik icma quruculuğuna və onun dayanıqlığına töhfə vermək işimizin vacib istiqamətlərindən birini təşkil edir. Biz təməlində qarşılıqlı hörmət və anlayışın olduğu, kimliklərin və təcrübələrin rahat ifadə edildiyi, o cümlədən yoldaşlıq, dəstək və aidiyyət hissinin mövcud olduğu təhlükəsiz məkanlar yaradırıq. Biz həmçinin dəyişiklik yaratmaq arzusunda olan icmadaşlarımız üçün müxtəlif təlim-tədris və təcrübə imkanları yaratmaqla onların icma quruculuğunda fəal və dayanıqlı iştirakına dəstək oluruq.

Fərqindəliyin artırılması

LGBTİ+lərin təcrübələrinin görünən olması cəmiyyətin sosial, iqtisadi, siyasi və mədəni həyatında dərin kök salmış qərəzləri qırmaq yolunda vacib rol oynadığını düşünür, bu təcrübələrin dəyişdirici gücünə, düşüncələrə və duyğulara təsir etmə, empatiya hissini gücləndirmə iqtidarına inanırıq. Biz fərqli platformalardan və yaradıcı üsullardan istifadə edərək LGBTİ+ təcrübələrinin görünən olmasına çalışırıq. İşlərimiz arasında icma görüşləri, panel müzakirələr, mədəni tədbirlər (sərgi, film nümayişi) təşkili, o cümlədən audiovizual və yazılı (podkast, məqalə, videoçarx) məzmunların yaradılması və s. yer alır.

Müvəkillik

Biz Azərbaycandakı LGBTİ+lərin yaşadığı reallığı dilə gətirərək icmamıza qarşı ayrı-seçkilik doğuran qanun və praktikaları sorğulayır, hüquqlarımızın tanınması, təminatı və qorunması üçün ictimai vəkillik edirik. Müvəkillik səylərimizə başlıca olaraq kampaniyaların təşkili, hesabatların və nəşrlərin hazırlanması və hüquqi presedentlərin yaradılması daxildir. Bu cəhdlərlə biz müvafiq qərar qəbuletmə proseslərini və daha geniş ictimaiyyəti məlumatlandırır, o cümlədən regional və beynəlxalq insan haqları təşkilatları ilə əməkdaşlıq etməklə vəkilliyimizin təsir dairəsini artırmağa çalışırıq.

Biz hesab edirik ki, məlumatlı fəaliyyət effektiv fəaliyyətdir. Ona görə də fərqli üsullardan istifadə edərək biz Azərbaycandakı LGBTİ+ icmasının yaşadıqları təcrübələri, çətinlikləri və ehtiyacları öyrənir, proqramlarımızı və ictimai vəkillik fəaliyyətimizi icmamızın üzləşdiyi ən problemli məsələlərə yönəldirik. Bu təkcə fəaliyyətimizin aktuallıq və effektivliyi baxımından yox, həm də müvəkilliyini etdiyimiz icmanın tələb və ehtiyaclarını qarşılamaqla bağlı daşıdığımız qayğıdan irəli gəlir.